源記餐廳 (已結業)

香港地，話大唔大，話細唔細，有緣就能相見。我講嘅緣就係源記餐廳，源記有數間分店，尖沙咀、大圍、上環、葵芳都有蹤影。最近連銅鑼灣霎東街都有間源記餐廳開張，真系源源不絕。以前幫襯開尖沙咀源記，價錢經濟抵食，水準穩定，所以今次就試試霎東街分店。銅鑼灣舖租出名貴，所以呢間源記面積不算大。但勝在麻雀雖小，五臟俱全，餐廳有多款茶餐、馳名燒味、精選飯餐、特色撈公仔麵、粉麵套餐、咖哩飯類、雲吞、水餃、牛丸、魚旦、牛腩、小食、三文治和冷熱飲品選擇。坐下叫了燒味叉燒燒肉雙拼飯、炸雲吞、淨水餃、法蘭西多士、飲品凍奶茶和紅豆冰。叉燒燒肉雙拼飯，叉燒肉軟冧帶甜，燒肉皮脆肉香，加上飯底粒粒乾身晶瑩，水準不錯。炸雲吞有八粒，外皮炸得鬆脆，裏面蝦肉又熱又彈牙，蘸點伴碟沙律醬來吃，非常醒胃。本來想叫淨水餃， 但售罄。於是叫了淨雲吞，又係有八粒。淨雲吞大大粒，每隻都有鮮肉和蝦仁，再配蔥花和上湯，食之而後快。至於法蘭西多士，外層炸得金黃，上面一塊厚切牛油，十分搶眼。特厚西多士邊皮炸得鬆脆，中間一層香濃花生醬，加上糖漿同牛油，味道香甜而不膩。飲品凍奶茶和紅豆冰，清甜可口又解渴。順帶一提，這裏店員服務態度親切，值得一讚。