凝香園 (已結業)

啱啱喺美食廣場「田灣食 mart」吃完熱狗，仍有點意猶未盡，決定再轉戰呢間港式傳統小食店「凝香園」。餐牌非常簡單，一目了然，當中包括有魚肉燒賣、咖喱魚蛋、白滑腸粉、雞蛋仔、格仔餅、碗仔翅同生菜魚肉等。雞蛋仔同格仔餅係我嘅至愛，而友人就對咖喱魚蛋、魚肉燒賣情有獨鍾，既然一場嚟到，就一於買多幾款齊齊分享。雞蛋仔同格仔餅每底都只係 $10，非常抵食。雞蛋仔顆顆渾圓飽滿，咬下外層酥脆，裡面軟綿鬆化；而格仔餅亦烘得金黃均勻，啖啖都食到醬料。魚蛋彈牙爽口，配辣醬同豉油食，夠晒惹味；而魚肉燒賣水準亦唔錯，每啖都食到魚肉嘅香味，入口軟滑得來有彈性。另外生菜魚肉同碗仔翅都好正，兩款小食都係唔少香港人的集體回憶。魚肉做得挺身，食落彈牙有嚼勁！碗仔翅亦毫不遜色，每一口都能嘗到滿滿材料，撈埋啲浙醋食，更可以提升佢嘅味道。聽朋友講，只要消費滿指定金額，商場就會有泊車優惠提供，所以每逢假期同週末，都有唔少人揸車嚟買外賣。