初麥手作烘焙

營業中

休息中

布甸包依樣野都紅左一段時間，不過因為油麻地嗰間太多人排隊，每次都夾唔啱時間，同布甸包無緣。近排知道原來港島有間麵包店有得賣，咁啱喺北角食完lunch見差唔多時間，就專程過嚟睇睇。布甸包固定3點半出爐，差唔多鐘數嚟到已經見到有條人龍喺出面排，雖然係假日，但又唔算話好多人排嘅。不過基本上依個鐘數嚟嘅大家全部都係買布甸包，其他產品比較少見到有人買。店內布甸包有分原味同埋香芋，另外仲有布甸葡撻。我今次淨係買左原味($15)，如果芋頭味要$19，見大部分人都係買芋頭，可能比較有特色啲。本身攞到上手以為係熱辣辣，不過點知原來唔係，同想像中有啲出入。因為返到屋企唔係即刻食，所以都要入烤箱叮一叮。叮完食落覺得啲布甸非常順滑，有入口即溶嘅感覺，而且個麵包烤到脆卜卜，texture都幾特別。食得出有焦糖嘅味道，不過個人覺得個布甸偏甜左少少，有啲食唔慣。自己嚟講覺得食過一次就可以，可能依樣野食本身唔係太適合我，有啲甜得滯。