住家餃子專門店 (文咸東街) (已結業)

唔知最近天氣發生咩事，但係好熱，熱到人都癲，好想淨係留喺有冷氣嘅地方就算，可惜約咗人岀去夾嘢，冇得唔岀去。夾完嘢都差唔多一點，諗住揾啲嘢食，食完就返屋企，喺文咸東街近滙豐嗰頭見有間餃子有開，冇諗咁多就入咗去先。套餐有三款，分別係餃子加湯麵、餃子加冷麵同埋餃子加時菜，天氣咁熱就梗係要個冷麵啦，餃子款式都多，有差唔多十款，我睇完之後嗌咗個京蔥牛肉餃，總數65蚊。冷麵比想像中大碗，材料就有木耳、冬菇同芽菜，再加捚上面嘅芝麻醬，食落好清爽。餃子方面份量十足，味道唔會太咸，點一點佢提供嘅醬汁已經好好味。醬汁有兩款，蒜蓉陳醋同老乾媽辣椒油，咁熱我一定唔會點辣油。總括幾有住家嘅感覺，店舖仲可以買生餃子返屋企，下次可以買啲比屋企人試下。