Ohayo

營業中

休息中

今日喺海港城行完街食完飯，心思思想食個甜品，見到海港城嘅現金券可以用呢一間，就行咗過嚟食。個位置都算偏僻喺海運中心嘅最角落位置，搵咗一陣先嚟到。坐低見到個餐牌已經比佢啲甜品吸引咗，我同朋友最後嗌咗一個哈密瓜熱香餅，同埋朱古力麻糬窩夫。原來哈密瓜熱香餅仲係限量12份，好好彩去到嘅時候未賣晒！！哈密瓜熱香餅係一個好新奇嘅組合，佢哈密瓜入面裝住啲雲呢拿雪糕，哈密瓜啫喱，仲有熱香餅，上面仲有蜜糖星星。 啱啱整好熱辣辣嘅熱香餅，配上冰凍嘅雪糕，同埋多汁香甜哈蜜瓜，成個組合好新鮮，一凍一熱咁，好正，熱香餅鬆軟，好香麵粉牛奶味，個雪糕都好幼滑，冇冰粒冇沙，唔會太甜。我哋連哈密瓜啲肉都刮埋落嚟食晒。 跟住到個朱古力麻糬窩夫，啱啱看好嘅窩夫，熱辣辣咁啲麻糬都係半溶化狀態可以拉絲，煙煙韌韌，連埋好脆外皮嘅窩夫，成個口感都係好好食。仲有一球朱古力嘅雪糕，好重朱古力味，又係冇冰粒冇沙。 其實我好驚喺出面食到啲雪糕係有啲冰沙喺入面，即係溶完雪又雪返落雪櫃，一定係好唔新鮮，或者處理得好差。 呢間嘅甜品真係好靚，用嚟打卡一流，味道亦都唔差，咁啱有海港城券，過嚟食甜品真係好正！