囍公館 (已結業)

今日同男朋友慶祝生日，黎到囍公館食晚餐。雖然餐廳主打食中菜，但環境幾似西餐廳，燈光比較昏暗，氣氛都唔錯。野食方面我地就叫左三樣野，分別係香草蜜豆玫瑰露叉燒 / 龍皇海鮮泡飯 / 大廚炒飯。香草蜜豆玫瑰露叉燒，食落其實有少少失望，因為好多人推介依個，但我覺得都係有少少普通，相比一D專門食叉燒既餐廳有段距離，而且價錢唔算特別平，如果唔係特別喜好叉燒可以唔使試依個。龍皇海鮮泡飯，依個就相當有驚喜，佢上菜時湯同飯係分開上，個湯係熱到滾果種，值得一讚! 而個飯好特別，佢係有種脆脆地既感覺，唔係一般平時食到既飯，再加埋個湯有好濃既龍蝦味，成件事加埋好正，都好岩冬天食，食完會有好暖既感覺。大廚炒飯，成個飯都好足料，有蝦肉、帶子等等，而且個飯都炒得幾乾爽，算係幾抵食。到最後我預備左個生日甜品比我男朋友，外面係朱古力，而入面應該係有D酒心紅莓醬，食落酸酸甜甜，都幾特別。我覺得成個餐廳野食並唔係重點，當然都算係合格之上，而係餐廳氣氛環境都好適合情侶黎慶祝，而且出面就係無敵大海景，夠哂浪漫。準備慶祝既你都可以諗諗黎依到一試。