麻辣派對 (瑞生酒店) (已結業)

自從上次開過"麻辣派對"後，就一直對佢念念不忘，趁住呢兩日天氣轉冷，一於黎開個派對食d辣嘢暖暖身。今次來到尖沙咀分店，由地鐵站行過黎都只係需要幾分鐘，非常方便。同銅鑼灣分店一樣，餐廳內佈置迷幻，感覺特別。坐低後梗係第一時間睇下食乜， 由於上次已經食過水煮魚，所以今次想試下佢個香鍋，最後我地揀咗麻辣雞鍋，再加埋午餐肉，台灣貢丸，茄子，四季豆同土豆做配菜， 辣度揀咗中辣。香鍋好快就上檯，份量好大盆，上檯時香噴噴熱辣辣，辣椒及香料味十足。中辣辣味相當過癮，用嚟配白飯食一流，雞鍋有半隻雞，但好似一路食都食唔完咁，厚切午餐肉吸收晒鍋入面嘅辣汁，非常惹味，土豆已經煮到夠淋，唔駛等好耐就有得食。香鍋用明火坐住，可以慢慢食，唔駛驚食到一半已經凍晒。鍋入面有好多辣椒，相當足料，用明火煲住辣味不停滲出黎，越食越過癮。餐廳最後送上紅豆沙做甜品，辣完一輪後食返d甜嘢中和下，感覺好舒服。埋單每人唔駛二百蚊，食完全身暖笠笠，得閒黎開返個party都唔錯。