泰象館

營業中

休息中

係九龍城按完腳，去咗附近搵嘢食，九龍城最多就係泰國餐廳，今次食下城南道一間泰菜，門面細細，未夠7:00已經坐滿人，相信附近街坊都經常嚟呢度食嘢，聽到有啲客人講泰文。今次食咗幾款泰國餐廳必食嘅菜式，首先有豬肉生菜包，豬肉味香，口味適中，唔會太鹹或者酸，生菜亦都洗得好乾淨同埋新鮮。之後有黃咖喱雞配薄餅，尚算足料，雞肉亦都冇骨，食起嚟比較方便，配上薄餅，冇得輸，另外仲有馬拉盞炒椰菜苗，比較少地方到，爽脆，配上洋蔥一齊食好fresh ，最後用一個新鮮椰青結尾，食埋啲椰子肉，就當去咗泰國🇹🇭，自欺欺人一下。