Orange Elephant Thai Restaurant (利奧坊) (已結業)

好耐冇見嘅大角咀朋友約我食飯，我哋就選址Orange Elephant Thai Restaurant。呢度做緊推廣，每日都有$1指定菜式，真係好抵！食泰國菜當然要食泰式拼盤，可以一次過滿足晒幾個願望。炸蝦餅大大件又夠彈牙，就算唔食拼盤都一定要食佢。春卷外皮脆卜卜，入面嘅餡料都好食。魚餅就比較濃味，充滿泰國嘅味道。香葉包雞嘅雞肉幾嫩滑，仲帶有香葉嘅味道。每逢見到咖喱包都忍唔住要叫返一份，呢個咖喱海鮮脆包盅有滿瀉嘅咖喱汁。入面有好多唔同嘅海鮮，大蝦、青口、魷魚等，配埋又甜又香嘅咖喱真係好食。另外仲揀咗椰青焗海鮮飯，厚厚嘅椰漿淋喺焗海鮮飯上，撈飯一流。焗飯入面就好多配料，除咗海鮮，仲有烘得香口嘅椰絲、腰果等，夠哂豐富。最後嗌多兩杯凍飲，珍多冰同泰式奶茶飲完更加透心涼。