泰金鍋

餐廳：泰金鍋 (觀塘)
地址：觀塘觀塘道414號1亞太中心10樓

記得第一次食泰金鍋喺旺角店啱啱新開嗰陣，火鍋放題加上任食流水蝦🦐，仲有泰式美食、甜品同飲品🇹🇭，比起平時嘅放題店更加有特色同與別不同

每晚7點前離座或者8:30pm後入座，成人叫A-C餐，用電子支付有8折優惠；60歲以上拎樂悠卡嘅人士去食午市放題套餐亦可享小童價；而我去嗰陣仲做緊超筍會員優惠，逢星期二晚市四人同行就一人免費，著數多籮籮，去之前記得計吓數點食先最抵喇😎

今次叫咗美國產極選肩胛牛小排餐($298)，可以食足120分鐘，有超過100款食物可以任食，打邊爐之前先出咗去拎咗啲前菜同熟食，海南雞、叉燒包、蝦餃、燒賣、冬蔭功海鮮湯等美食花多眼亂，特別推薦嫩滑到極致嘅海南雞🐔，雞肉鮮香味突出，忍唔住食咗10舊8舊😋，另外仲有泰式沙律🥗、咖哩🍛、雜菜、炸物等

食完前菜就開始掃QR code嗌嘢食，當中有唔少食物都喺即叫即制，例如酥香炸潮牛丸、泰式炸蝦餅、煉奶老油條、黑糖炸年糕等，而嚟到又點可以唔試佢哋嘅「潮串燒」呢🍢？串燒雞軟骨、燒蒜香豆皮、串燒牛肉🐮、焦糖菠蘿等你又鍾意邊款呢😎？

之後開始打邊爐，湯底揀咗新口味——金湯酸菜魚鍋，雖然鍋入面就無魚肉，但酸辣嘅滋味既開胃又增添咗食物嘅層次味道👅，肉類有美國產極選肩胛牛小排、極上牛舌、澳洲產下肩脾肉眼、嚴選特級牛胸腹同特選豚梅肉，各有千秋同特色，
個人摯愛喺肉味香濃嘅牛小排同牛舌，肉嘅質素絕對唔差，亦唔喺雪藏肉，想食埋和牛就可以揀高級啲嘅套餐😜，出面仲有幾十款火鍋配料同蔬菜可以食

飲品方面一定唔可以錯過泰色奶茶🧋，仲有好多自家製茶飲同啤酒任飲，甜品有自製椰汁糕、Frozen Yogurt雪條、雪糕杯等，臨走前一定要食埋甜品先走🍧