L.D.K. by Ufufu Café (新城市廣場) (已結業)

可能係新開張嘅關係，星期六嘅中午等咗 15－20分鐘左右先入座，好彩一切都算值得嘅。見到 menu 選擇都幾多樣化，不過下午茶唔想食太飽，少少甜品就足夠了。點咗兩樣都係日本特產口味，好有日本風嘅感覺（去唔到日本唯有咁樣欺騙住自己先啦）。唔少得嘅甜品就有『静岡蜜瓜法式吐司』。我覺得個蜜瓜嘅切法好靚好似藝術品雕花咁，真係欣賞咗一陣先捨得食。吐司比想像中來得大份幾飽肚下，静岡蜜瓜又真係幾掂喎，以為佢係冬季限定，點知店員話全年都有！正丫！再嚟係『抹茶意大利芝士餅配福岡八女抹茶』。意大利芝士餅通常都會用透明器皿裝住，比客人清楚睇到唔同層次，呢度反而用個木盒仔裝又係另一種感覺，仲好配合返餐廳本身和風嘅感覺。我自己就覺得抹茶嘅味道有啲重有少少苦，但友人話，學 DJ 森美話齋，正宗嘅抹茶係會有少少苦味架！食完個甜品再飲返杯抹茶，係自己落手沖嚟飲又幾過癮，仲可以中和返口腔嘅味道，感覺好體貼。