火鍋撚 (雲明行) (已結業)

中環店開嘅時候第一次食係覺得好食嘅，只不過返到屋企先醒起有海蝦同貴妃蚌無嚟到，即刻睇返張單見到有落單㗎，白白蝕咗五百大元。其間都有再去食過五丶六次都滿意嘅，但係上星期日去食真係好唔滿意，服務質素差很多，食物質素亦差很多，以後都應該唔會再去。訂枱時都已經知道八點半還枱，去到門口時侍應用好差嘅語氣講八點半要還枱㗎，嗰下已經覺得好哽耳，之後落單叫牛肉問侍應我地之前食過用個架涼起嗰啲牛係邊隻，佢話係安格斯肥牛，但係攪笑嘅係佢之後再講話手切肥牛好食D，安格斯用個架掛住好睇D啫，咁佢咁樣建議，原本諗住叫兩客安格斯咪叫埋手切，點知伏咗，手切肥牛又韌又無味，就算安格斯都差好多，無乜肉味。麻辣火鍋湯底只有辣，一D都唔麻。食食下想加個烏冬，講咗兩次，結果佢無啦啦攞咗個碗比我地，咁都係得啖笑啫，咪再講多次大聲D話要烏冬囉。最後一個重點就係我老公杯啤酒喇，平時我老公對於我寫food post 都無乜表示, 但係今次連佢杯啤酒都勁淡無啤酒味佢都嬲嬲豬支持我寫。