麵家山下 (已搬遷) 新店位置

又落上水搵食了，之前聽過有間拉麵店非常出名，上開網一搵就搵到呢間"麵家山下"喇。餐廳位置比較隱蔽，夾雜於好多藥房中間，門面完全唔顯眼，唔係突登搵都未必見得到。餐廳分兩層，樓下門口有餐牌，等你揀好後落單俾錢，之後就上閣樓等佢送麵來。樓上大約二十個座位，牆上貼咗日式海報，佈置非常簡單。等咗大約五分鐘，拉麵就到了。今日點咗叉燒拉麵，先試啖湯底，豬骨湯香濃鮮甜，飲得出無落味精，拉麵唔會煮得太淋，食落爽口彈牙，叉燒夠入味，亦非常柔軟，配料有芽菜，紫菜及筍，當中筍片夠爽口好味。總括黎講，呢間小店由日本人親自打理，店舖雖然唔起眼，但拉麵風味十足，絕對值得支持。