秘 (偉晴街)

營業中

休息中

第1次去撞上情人節，想同伴侶食餐特別啲。因為餐廳唔可以訂臺，所以我哋係6點15分左右就到，門外都見到有啲人排緊隊，不過唔使等好耐。店員排緊隊嘅時候就會先叫你點餐，所以一入到去其實好快就已經有食物上臺。餐廳環境比較細，需要同人搭枱。如果叫嘅食物比較多嘅話會比較阻埞。覺得如果情況許可，之後裝修可以增加返少少卡位坐得舒服啲。食物方面我哋叫咗個野菜鍋，蝦球，燒安格斯牛，同炸牛嗰個。兩個燒牛其實唔使點個醬已經好夠味，我覺得比起更貴嘅一啲日式燒肉更好食，牛肉入口軟身重牛味，調味亦都唔會太搶咗浸牛味，比例啱啱好，而且分量都好多。石板上面附送咗1塊牛嘅油脂，不過可能因為個炸衣問題，就算塊板好夠油都係會黐住少少係度。燒到一半，店員亦都會主動過嚟幫你加火。碗飯幾大碗😂，完全唔會話唔夠飽，而且碗飯本身都有味可以直接吃，啲飯夠香夠軟，做到日本飯店煲出嚟嗰啲飯粒嘅水平。唯獨是湯，可能我唔識欣賞🤔🤔飲到後面佢凍咗時會有少少苦味，一般般。蝦頭幾好食不過份量我覺得可以多一兩粒就更好。野菜鍋比我想像中好食，湯底有少少碎南瓜，好甘甜，而且分量好多，上到嚟滿滿一碗，性價比超高。