影片
更多
2022-01-18
2552 瀏覽
唔需要我多講，應該好多人都知Hugo's個Brunch好難Book，我以前都食過幾多佢平日嘅Lunch Set，所以都幾期待佢個Brunch，成日問職員都話未來一兩個月滿曬，又話未開放更後嘅訂坐，咁啱最新出咗某某信用卡，就成功用佢個訂位服務訂到位，一早知呢間餐廳食物選擇唔多，主菜只能Order一次，無所謂啦，年紀大，就算咩都任食都食唔到幾多，一於奉行「貴精不貴多」嘅原則（被逼、鬼叫個胃唔生性）。前菜黎黎去去都係個啲嘢，唔多講，要講嘅就幾樣：＊火腿切到得咁碎，又比較乾，密瓜又硬又無味＊生牛牛tartare個介紹牌寫到好利害咁，咩Hugo's Signature，食落唔夠滑，唔夠嫩，又出曬水咁，入口仲有少少粉狀嘅口味，我唔識欣賞囉。＊生蠔我無食，我啲朋友食兩三隻後都無再拎，佢哋嘅意見係：瘦、無海水味，鮮度一般，最大優點係無殼碎。＊凍龍蝦，每人試咗半隻就無再拎，呢樣最失望，舊年某KOL大讚呢度嘅凍龍蝦高汁，我成日跟個位KOL去食嘢都無試過中伏，今次可能由於事隔大半年，加上唔止呢間餐廳，好多食肆響疫情下，一邊加價一邊偷公減料，入埋啲Cheap貨，舊龍蝦擺盤嘅時候殼向外，拎返埋位影完相一反轉，唔
前菜黎黎去去都係個啲嘢，唔多講，要講嘅就幾樣：
＊火腿切到得咁碎，又比較乾，密瓜又硬又無味
＊生牛牛tartare個介紹牌寫到好利害咁，咩Hugo's Signature，食落唔夠滑，唔夠嫩，又出曬水咁，入口仲有少少粉狀嘅口味，我唔識欣賞囉。
＊生蠔我無食，我啲朋友食兩三隻後都無再拎，佢哋嘅意見係：瘦、無海水味，鮮度一般，最大優點係無殼碎。
＊凍龍蝦，每人試咗半隻就無再拎，呢樣最失望，舊年某KOL大讚呢度嘅凍龍蝦高汁，我成日跟個位KOL去食嘢都無試過中伏，今次可能由於事隔大半年，加上唔止呢間餐廳，好多食肆響疫情下，一邊加價一邊偷公減料，入埋啲Cheap貨，舊龍蝦擺盤嘅時候殼向外，拎返埋位影完相一反轉，唔使食用眼睇都知出事，完全全平面好實好乾咁，嬲得滯無影相，唔知大家去試下就知，仲差過之前食個啲中下價自助餐嘅凍龍，當時我已經第一時間向職員反映，佢話幫我留意下下一轉會唔會有改善，有嘅會拎件俾我試下，點知到埋單都人拎過俾我，再出去拎嘢食時自己都睇過，全部係龍膠都我都費時再試，除咗龍膠，隻龍膠鉗一樣敗北，原隻任拎，但廚房懶到一個點，每隻都好完整，無幫客人開邊或整碎先，現場唔見有任何工具提供，咁點食呀？搵叉慢慢「了」囉，了得幾了我都唔食了。
＊海鮮選擇超級少，計埋三文魚，就只有沙律蝦、白灼蝦同凍龍膠，人造魚子醬恕我唔計在內啦，連加一$922，咩卡都無優惠，我諗唔到佢有咩吸引力，想食牛肋扒平日黎食Lunch Set平幾百就得啦。
＊酒店縮皮縮度麵包上邊，以往餐廳提供嘅麵包籃入邊至少有三款包，牛油酥最多人like，好多時客人食唔曬仲可以拎走添，但兩三個月前已經變咗一枱一個大包一開四，你食就食，唔啱食就無使食，真係人都癲。
＊主菜個牛肋扒一向係餐廳重點菜，無論係Lunch Set、Dinner Set定Brunch都係同一樣嘢，無一次令我失望，但呢次直頭有驚喜。我記得舊陣時係有個外籍大廚負責即場切，仲會同客人傾下介紹下，家陣變咗一個四眼肥仔廚師切，切得鬼咁薄，咁孤寒做咩？又唔係切佢啲肉！又同客人零交流，改由經理同客人介紹，對上兩次平日食Lunch Set（上年9月同12月）都係遇著佢，唉！塊牛連1cm都無，唔知佢幾時會轉職呢？轉佢去隔離自助餐廳就好啦！講番今次舊牛，同枱兩個朋友第一次黎食，我極力推薦要牛，一上枱我嚇咗一跳，我哋三份牛都叫Medium，我個份第一個上，係rare，一定係rare，你話係raw我都信，另外兩份跟住上，外圍可能係Medium，中間一定係rare，咁我梗係同經理講我要Medium，咁生頂唔順，佢話咁係Medium，咁我只好叫佢grill多陣囉，grill 完出黎三塊扒都響曬水，本來都無1cm，依家變曬印度烤餅咁上下薄，而且熟到Medium Well以上，真係好好彩舊牛本身靚，食落唔夠滑嫩但大家都覺得好食，唔係真係要換。另一樣就係隻碟係唔熱嘅，食咁多次第一次係咁，以往廚房會暖定碟上菜，今次居然無，唔通換曬班底？
＊最後甜品，正正常常，款唔多但都叫OＫ，無咩好講，要講就係自制嘅雪糕，兩款雪芭一款雲呢拿雪糕，落足料見到好多雲呢拿籽，食落口一粒粒咁，唔係啲籽，係冰粒，建議餐廳直接提供盒裝雪糕算。
唉~到底發生咩事？間餐廳連最吸引嘅主茶都搞成咁？你話難食我可以講唔係，但咁嘅價錢真係大把好過佢嘅選擇，為乜要咁花時間功夫去訂位？成件事最慘嘅係，佢由今個月10號開始可以網上訂位，不過要即時網上俾曬全數（舊網上系統永遠搵唔到Brunch），我Full Paid咗下個月中8位，大鑊，個班友個個食開好嘢，咁嘅質素同價錢點收貨？我又即時同職員講我想取消同退款，佢叫咗經理黎，阿經理都循例對我嘅不滿感到抱歉，然後俾張卡片我請我電郵佢講下有咩唔滿意同書面要求取消訂位同退款，唉～真心煩～
我同佢講，叫佢拎件龍蝦食一啖就知，我講兩次不過佢都係無咁做......
32 瀏覽
0 讚好
0 留言
42 瀏覽
0 讚好
0 留言
35 瀏覽
0 讚好
0 留言
28 瀏覽
0 讚好
0 留言
題外話/補充資料：
個Brunch本身包果汁任飲，但飲品無放出黎，要等侍應捧住一大盤十幾杯分三款嘅果汁行埋你度俾你揀，我食到第二碟前菜時先有人拎俾我地揀，11點39分坐低，12點幾先有第一杯，細細杯兩啖就飲完，再等到差唔到2點都無人幫我refill，要等我叫人添飲要有人理我，個場因為防疫政策唔可以坐滿，唔多人，但職員更少，我都唔好意思太多要求。我認為所有嘅錯一定係管理階層嘅問題，一定係縮皮，我覺得佢地咁做最後只會做衰個名，香港好多公司就係咁，前年爆肺炎，酒店同飲食業大受打擊，曾經佢地都肯落功夫，一係減價一係提升質素，好多餐廳同時咁做添，到舊年疫情叫做受控，市民漸漸出番黎食飯消費，又開始諗點樣賺多啲，咁加價咪算囉，呢間餐廳收費都叫中等上少少啦，上兩個月先係7百幾加一，我食時已經加多一舊水，咁你加多一百幾十都唔會影響客路啦，一開始一樣一位難求，何必要CUT食物成本呢？真係當食客傻架？Hugo's係咁，上個月食Brasserie on the Eighth又係咁（不過人哋都多嘢食同好食過呢度），唔通要等你地搵水魚賺夠一輪到無曬客啦，先又再改善質素再去吸客咩？今次希望可以取消到下個月嘅訂座同退到款啦，退唔到而到時啲嘢食又唔掂，真係驚我班朋友詐形要經理逐碟食物換過囉~唉～
(以上食評乃用戶個人意見 , 並不代表OpenRice之觀點。)
張貼
