好時沙嗲

營業中

休息中

今日揸車入錯線，變成誤打誤撞食飯時間入左尖東。咁去到尖東平食，吾想去大快樂大太興之流，又或者五十蚊去咖啡店食包，咁《好時》不妨係個好選擇。睇吓 OpenRice 先殺上去，留意近日負評多左、亦順道了解了解。去到《好時沙嗲》，當然係衝住佢哋既「串燒」同「海南雞」； 當然有 「Lesi Lemak」同 「加多加多」都好想試，奈何兩個人兩個胃，冇謂勉強。油飯的確同海南雞/三色醬先後咁上，但我今日呢個先後就相差吾夠三十秒，可以接受。隻雞起咗骨啖啖肉，冇文華嗰啲咁滑，但亦吾係文華價錢，一百蚊尖沙咀堂食半隻雞起埋骨，仲又滑又吾肥，抵喇！ 講少少個油飯，係香到不得了，爬完一啖要即刻再爬多啖飯去滿足味蕾既索求。串燒好重要係熱上 （我自己試過D沙嗲擺凍左先攞上枱），個精粹在於個沙嗲汁。係好味既！一啲都吾辣，有花生香，我個人覺得串燒鷄最好食，內子食豬肉串，評語係「麻麻」喎。午餐仲要汽水五蚊支，我哋每人八十幾蚊落樓，十分滿意既午飯。總結： 冇問題喎，對我嚟講，尖東午餐平靚正之選。