101台式休閒餐廳 (青衣城2)

營業中

休息中

平日比較少黎青衣城，今日因為約左朋友睇戲，所以便選擇係依度食埋晚飯。我哋行吓揀吓，見到有依間食台灣嘢嘅餐牌睇落都唔錯，所以就決定一試。成間餐廳設計都比較開揚，由於去嘅時候已經係晚飯時間，所以餐廳已經full哂。等左一陣，終於有位，我同朋友即刻睇吓個餐牌有啲咩好食。餐牌成本都係set dinner，主要有一人餐同二人餐。我同朋友分別點了一人套餐。套餐包小食、主菜同飲品，大部分都係70蚊度，一啲都唔算貴。我哋揀左兩個小食，分別係鹽酥雞及台式香腸。鹽酥雞炸得香口，炸粉不算太厚，粉同肉比例適中。香腸亦都好好味，乾身不算太油。主菜係台灣牛肉麵同板燒雞柳併章魚餅肉燥飯。我留意到依度嘅牛肉麵係有三種口味嘅，包括：原味、辣味及蕃茄湯底，而我哋今次試左原味。牛肉嘅份量好足，蘿蔔亦滲入左牛肉湯嘅香味，加上面頭佈滿香蔥，其賣相都幾吸引吓。至於另外嘅雞柳併章魚餅飯，我本人就覺得最好味嘅係飯上面果塊章魚餅，中間嘅滷水蛋如果可以俾多半隻就更加好啦！由於set dinner包埋嘢飲，所以我哋點左個蜜桃紅茶同盆栽朱古力特飲，兩個嘅size都係屬重量級，特別係朱古力特飲，超濃味，對朱古力情有獨鍾嘅人士，一定要去試試。