寶哥火鍋味館 (已結業)

秋風起食臘味，但在這個剛入初秋時份，朝早太陽赤熱中帶點涼風的時間，當然去打邊爐啦。尤其是一大班人，打邊爐又可以慢慢邊食邊傾，大家都可以選擇自己喜歡的菜，顧及大眾感受。今晚又再光臨其中一間我最喜歡的火鍋店–寶哥，除了火鍋湯底夠特別外，用料新鮮，即使是任食的配菜都比外邊的高質。打邊爐必點的啤酒，這裏都是任飲的，全部都雪到冰凍，一邊食火鍋一邊入啤酒，簡直是冰火兩重奏。湯底我們點了番茄牛坑腩，番茄味就不太濃郁，坑腩煲到又腍又入味，後尾我們點了些番茄令湯底更濃郁。先送上來的是刺身拼盤，有六款刺身包括了赤貝、希靈魚、魷魚、吞拿魚、北寄貝及八爪魚，刺身味道鮮甜，尤其是希靈魚入口咸鮮味。海鮮有五款包括元貝、象拔蚌仔、蠔、蝦及龍躉，全部都十分新鮮，蝦肉彈牙，魚肉嫩滑充滿骨膠原。靚牛肉色澤鮮艷，油脂均勻，碌一碌就食得，肉質嫩腍有肉香及油脂甘香。手打丸有墨丸、鯪魚丸及牛丸，最好味一定是墨丸，爽口彈牙；牛丸有果皮香，味錯不俗。其他任食配料包括必食的魚蛋、雲吞水餃、新鮮魚片、菜及稻庭烏冬等等。整體食物質素能保持水準，價錢略加了一點，但有此質素及款式，價錢合理。