名廚

營業中

休息中

食過幾次呢間餐廳，都覺得唔錯。咁啱上次食之前見到佢OpenRice評語唔係好多，就專登係食飯嘅時候影多幾張相，諗住幫佢寫下食評。今次我哋係六個同事連老細一齊中午嚟飲茶。佢依家中午12點先開，成間餐廳得我哋一圍，非常正，好似包場咁，員工嘅服務態度都非常好，佢哋亦都會專登俾多啲自由空間你，唔會全程企喺側邊serve 你，有需要先會過嚟。呢個煎粢飯係員工介紹嘅，佢會跟返人頭切俾你，味道ok，煎得幾香幾脆，但係唔係特別推介。呢個檸檬叉燒酥呢就正，個酥皮好脆，入邊啲叉燒都好味，我哋一致極力讚賞。個小籠包我就冇食到，因為我唔係特別好，同埋佢哋話冇乜特別。呢個芋頭酥都好正，出邊好脆，入邊就好多料，唯一缺點就係入邊啲芋泥唔夠多，其他料太多冚過咗個芋頭。呢個酸菜米線，都好推介，覺得個湯好正。蒜香牛柳粒，啲牛肉超正，但係好貴。最後我哋每人人均$300埋單，價錢係偏貴，但環境同埋服務同埋質素我覺得都值得嘅，食兩個鐘頭好舒服。