嶺南會所

營業中

休息中

晌中環返工返咗七、八年多，成日話想試吓嶺南會所，因為都未試過上D會所式嘅餐廳食飯，咁多年都得講字，卒之哩日晏晝就過嚟食番餐，幾個同事，約埋舊上司一齊聚聚舊兼擦番餐！話要係嶺南校友先得，雖然小弟都係晌嶺南同學會小學（晌石硤尾白田街）畢業，不過講都無乜人識，索性托上托搵友人訂位，查實都係靠撻「朵」，大家講個信字！個名叫會所，聽落好似幾高檔咁，入到去發覺似街坊飯堂，無乜裝修，枱椅都好簡單，D伙計服務都好舊式茶酒咁，樣樣慢條斯理，咁都OK嘅，啱我哋食得無咁拘束。5個人就要咗5個午餐，唔單止環境格局似飯堂，連午餐嘅餸菜選擇都一樣好飯堂咁，卒之點咗家鄉蒸肉餅、三色蒸水蛋、蘿白牛腩、紅燒豆腐同炒個菜，包例湯、白飯，係咁多！樣樣餸雖然好家常，好普通，但做得絕對唔馬虎，好似個肉餅又真係做得好鬆化唔死實，不過，話到好好食又唔講得，個人認為算係中規中矩。反而喜出望外係佢嘅雪糕涼粉，臨尾我哋1人整番碗當甜品，好似$14一客，亦見周圍好多人有叫，雪糕可以揀芒果、椰子、雲喱拿，我哋分別叫齊3款味，始終覺得椰子最好食，雖然唔知咩牌子雪糕，但好香椰子味，涼粉又夠凍，糖水又唔太甜，爽呀！