植原

營業中

休息中

靚靚媽咪壽辰，週六午餐時份，一家四口就由大肥爸爸帶隊，前往一間幾位好友都曾經推介過o既壽司店「植原」，實行試食兼慶祝 。「植原」喺街道上並唔起眼，正門為拉敞式木門，門頂蓋上一塊藍布，低調得黎散發出傳統和式o既味道。店子o既英文名稱「Uehara」喺木門右旁以橙燈透出，簡潔樸實。壽司屋全店只有八個正常高度o既壽司吧位及一張四人散座，以木為主o既間隔簡約，坐落舒適清爽。通往洗手間o既後門通道設計成小石路徑，地下擺放有的骰燈箱及翠綠色o既盆栽，感覺猶如置身於日本庭園中，如廁都寫意過人 。洗手間整潔衛生，洗手盤上兩隻貓頭鷹裝飾趣致可愛，kawaii nee ！出面落緊大雨，踏入小店，企喺門邊o既一位男生隨即接著濕遮，帶領入座，並送上熱毛巾及綠茶，暖意洋溢。細小o既壽司店重質不重量，只供魚生菜式，午市餐牌只有一頁，晚市則冇餐牌，因只做每位約$1,500起o既「Omakase」（廚師發辦）。由於當日已約好與嫲嫲早食晚餐，媽咪胃口又比較細，肥肥家族最終棄選豐盛o既「Omakase」，而一同揀食「特上壽司」午市套餐。週六午市，小店內外全為年輕o既男生。溫文有禮o既哥哥仔先送上跟餐o既沙律一小碗。