2
1
主餐牌有牛，海鮮，豬，雞，一品料理，傳統韓食，湯。另有時令餐牌同野飲。餐牌簡單。
2
今次第一次黎，咩都叫啲黎食吓。
服務員好快就上左調味三寶，辣泡菜，辣蘿蔔，蒜蓉芽菜，
甜甜哋嘅薯仔絲同紅蘿蔔絲，
辣蟹仔，
芝士粟米，
同生菜包俾我哋，
服務員話可再添。另外仲有一大兜有蓋兜裝住嘅兩大棵泡菜俾你自己剪細食。食得哂都好叻，份量好多。
1
1
基本上大部份前菜都好好味又新鮮，最特別係芝士粟米，喺個爐上面熱融左嘅芝士之後變左勁拉絲，好邪惡。
調味三寶係鹽，味噌，辣椒同蒜片。我哋無須用到，食物本身已經夠味。
1
擔擔味噌茄子 $78 另加一
擔擔味噌茄子一客八件，新鮮吸哂油嘅茄子配好味嘅味噌，加左肉醬，蔥花，甜椒粒，同白芝麻粒，好味道。
壽喜燒和牛西冷(2件) $288 另加一
壽喜燒和牛西冷係薄切，服務員主動黎幫手燒，先用牛脂抹吓個爐，好快就食得。
另外配左隻蛋黃同飯團，上面灑上白芝麻粒。和牛配蛋汁好滑又嫩，壽喜燒好味道喎。
和牛牛肋肉 $158 另加一
和牛牛肋肉一客8件，份量唔少，已經醃好左味噌，味道好濃。牛肋肉當然需要咬吓，不過好有肉汁，好食。
慶州極上黑毛豬梅肉 $198 另加一
慶州極上黑毛豬梅肉一客兩大塊，都係已經醃好左味噌。肉質非常嫩口，直頭有啲似食緊雞肉，好味。
和牛三文治 $318 另加一
和牛三文治一客四件，白麵包夾住脆皮嘅厚身和牛，和牛帶筋同肥膏，需要咬吓。醬汁酸酸哋，好開胃。
菠蘿梳打，柚子檸檬梳打 各$36 另加一
菠蘿梳打既菠蘿味好濃，偏甜不過好味哈哈，仲有兩塊菠蘿食。
柚子檸檬梳打味道就淡啲，主要係梳打水味。下底好多柚子皮，面頭有一塊西柚。
食哂所有野好飽，今餐野食唔錯喎，食左咁多款肉，味道質感基本上都唔錯，前菜仲可以任添。我哋坐二人卡位，座位舒適，抽氣唔錯，食完完全冇油煙味。期待下次再黎。
