松記粥品

營業中

休息中

呢晚夜收工, 經過又新街見到呢間松記粥品, 開咗幾個月都未試過, 今晚就入去試吓先。 店內客人唔多, 地方都幾乾淨, 店內寫住係無厠所既。 我樣樣都想試, 但係食自己一個, 只能夠揀咗個魚片鹹廋肉粥、蝦米腸、牛脷酥。 阿姐問我牛脷酥使唔使碎上, 好細心。個粥底好綿, 啲料粥料味道都唔錯, 蝦米腸係即叫即做既, 好味道, 牛脷酥好大件, 味道一般, 如果係熱既我估會好好多。禽晚又走去食, 試咗個魚片鹹蛋粥(無影相), 有成隻鹹蛋, 啱晒我, 今次試咗個蘿蔔糕, 我覺得個糕粉太多, 所以有啲硬, 不過咪道都唔錯。  店內員工服務態度好好, 我見到有啲客睇咗個餐牌好耐先至叫嘢食, 阿姐都無黑面, 仲有個客叫阿姐收咗佢枱上既碗, 因為個客好細聲阿姐聽唔到佢講乜, 問佢講乜嘢, 個客就好大聲咁話"叫你收碗呀, 講乜!", 態度惡劣, 點知個阿姐一啲都無嬲, 仲好有禮貌咁同個客講"唔好意思, 我頭先聽唔到你講乜", 嗱嗱聲幫佢收咗佢個碗, 服務態度一流呀。