東昇樓海鮮酒家

營業中

休息中

一大班同事為左賀上司榮升之喜，係就近既東昇樓擺番圍食餐勁。先黎半隻燒鵝同燒腩仔攝下牙罅！燒鵝燒得又香又唔太肥，燒腩仔層層分明，食肉獸唔洗一陣就清左碟跟住到熱氣野上場，黑椒薯仔牛柳粒炒得乾身，黃金蝦碌被蛋黃完美裹上，一路開枝啤酒一路食就最正路！傾計傾到口水乾，黎個胡椒豬肚湯潤一潤，豬肚無異味，湯頭夠胡椒味十分暖胃，唔錯。蒜蓉魷魚同啫啫雞煲係下飯菜，吸晒醬汁既粉絲底比魷魚可能更吸引，面頭既金蒜怕口臭都要清晒去；啫啫雞煲夠鑊氣，係個汁比較重口味，不過大排檔風味都係咁上下。唔夠飽既男士加左個乾燒伊麵，炒得夠鬆身。作為東涌甚少既大排檔之一，呢個水平都收晒貨了。