無二 (已結業)

平日lunchtime IFC周圍都排隊，見呢間無咩人喺門口，雖然唔平但都快快趣食個lunch番去做野啦。我朋友去左霸位先，入到去企左陣都無人理我，個hostess行過我就「唔該...」，佢繼續行理都唔理我。忙呀嘛，咁我自己入去搵啦。坐低後叫左兩個lunch set, 一個係燒雞便當，另一個係兩碗唔同款既mini don。等左廿分鐘，終於黎第一個就係兩碗mini don, 到左之後我同我朋友都呆左，個盤咁大，得兩碗小得可憐既飯同一碗都係好細既麵鼓湯，無任何配菜。飯只係啱啱舖到個底，連埋餸都去唔到個碗既一半高度。而咁樣既一個set承惠260元正。又等左十分鐘，我個雞便當都終於黎。不過不失。但等到太餓拿拿林食完就走。相都無影。我朋友仲慘，餓住黎餓住走，連細食既女仔都無可能飽。我地坐既係四人枱所以隔黎吉左半張枱，喺我地進食期間，服務員行過喺張吉枱度整理單據入收錢既夾入面。茶餐廳無所謂，高級日本餐廳咁樣都幾o嘴。貴，份量少，味道差，上菜慢，零服務。呢間野真係無二，無第二次。