牛摩+ (沙田中心) (已結業)

好耐冇食過火鍋，揀咗$279晚市90分鐘美國極上和牛放題。食得呢個價當然冇諗過係特別好食嘅和牛，但諗住起碼會比平時又柴又冇味嘅牛肉好少少。首先佢哋唔係用電話QR code落單，只係用口嗌。亦都唔會俾個餐牌你，所以你要預先影低個餐牌你嘅套餐有啲咩，然後先至叫。第一碟嚟嘅牛肉正常，油脂分布唔錯，係好味嘅。我哋基本上3分鐘之內已經K.O.左一碟牛肉。我哋三個人，其實每人都係得幾塊。之後再叫，啲肉遲遲都唔來。無論要幾多碟，佢都只係會上一碟。食到大概第三或者第四碟左右，已經好明顯牛肉質素下降，覺得好似喺佳寶買啲最cheap嘅牛肉咁。仲要每碟之間起碼要呆坐五至10分鐘。要鴨血，冇鴨血。要和牛，就俾啲下欄嘅我哋，仲要等好耐先至有。環境逼夾，好多嘢都癡粒粒，感覺好污糟。出去攞完啲火鍋配料，成隻手癡立立。同埋火鍋配料選擇非常之少。埋單+1每人$304。肉嘅質素非常之差，火鍋配料種類少，服務態度差，環境差，以呢個價，有好多更好嘅選擇。以後都唔會再幫襯。