大統領 (已結業)

屋企人生日，近近地去咗屋企附近一間日本菜食。平時有閒錢都會去食，難得生日就食豪啲，嗌咗幾樣野食。第一道係日本蠔，由於我無食到，所以根據我屋企人覆述係幾甜同唔錯，$58 咁大隻都可以接受。第二道係金鯛魚刺身(半條)，師傅整咗兩款食法，我個人喜歡灸燒，因為腩位燒香咗個種油脂味真係好吸引😍。食落去好香👍🏻，普通刺身個款我就一般，無乜特別。配上新鮮Wasabi 值得加分。第三道係櫻花蝦炸豆腐，正常水準，有好多櫻花蝦，如果少返啲木魚氳汁會好啲，唔想浸到太腍。第四道係季節限定嘅蕃茄軟殻蟹青瓜冷麵，酸酸甜甜幾開胃👍🏻。蟹唔會擺到腍曬，仲係脆口。最後一道係花膠豚肉鍋，呢個就一般般，湯底麻麻但都足料。整體而言，北區有間有水準同有心做嘅日本餐廳真係好少見。希望可以keep住水準。