幸運星

營業中

休息中

又去到食晚飯嘅時候，頭痛緊食啲咩。今日晏晝公司請食飯食得好飽，所以夜晚只係想輕食就算啦!突然諗起上次經過太平館對面有幾間餐廳，即刻過去睇睇啦! 發現其中一間門口排曬長龍，但另外一間就少啲人等，咁就揀間少人。原來呢間幸運星係池記集團㗎，所以唔會有咩嘅期望。隨便叫咗餐牌上面幾款晚飯套餐， 又叫咗菠蘿油啦!菠蘿油個皮好脆，唔會一咬落去啲皮散開曬。避風塘豚肉炒烏冬賣相就好一般，但味道又唔錯喎! 唔會油淋淋，只係覺得豚肉同烏冬嘅份量比較少。蘿蔔豬軟骨煲配白飯呢個啲汁一定要配白飯， 唔會太鹹，豬軟骨同肉嘅比例恰到好處， 唔會過肥又唔會過瘦，啲肉質都唔會鞋口，蘿蔔入味。西蘭花炒豬頸肉配白飯呢個係比較差，豬頸肉乾爭爭，好似瘦肉咁，西蘭花尚可。要讚一讚個米，因為係絲苗米，食返往日係家食的口感。餐廳用星星做主題，連飯上都有一粒星。熱薑檸蜜再讚一讚，真係煲過，有薑，檸，蜜味，又夠熱。用雪糕機製，夠凍，不過奶味重D囉!餐廳嘅環境比較擠迫，不過侍應嘅服務態度都幾好，有笑容。追單嘅時候都有幫你跟單。