古今二 (荃灣千色匯I)

營業中

休息中

嚟到呢間位於荃灣千色薈嘅古今二，臨近聖誕，嚟到呢間鋪嘅時候門口裝飾增添左一份聖誕氣氛。鋪頭嘅裝修都係以白色同淺色為主，呢度食嘅日本菜主要都係一啲日式嘅創意料理。前菜首先叫咗一客龍捲風沙律，嚟到嘅時候都幾有驚喜，因為沙律疊得比想像中高，賣相就真係好似一個龍捲風咁樣，亦都似一隻巨大嘅八爪魚沙律咁，用料方面就係用咗蟹柳、蟹籽同沙律菜加醬汁混合而成嘅沙律，份量都相當多。然後點左一客網燒牛舌，呢度嘅牛舌好在夠晒肉地，上碟時燒得夠熱，食落時候咬口都唔錯，唔會咬唔開。唯獨係個人比較偏向食一啲燒得較乾爽嘅牛舌，而呢度嘅牛舌就相對油膩一點。今晚最鍾意嘅一個菜式就係個三文魚頭湯鍋，雖然佢係魚頭，但係都算幾多肉食，而且肉質非常嫩滑，成個湯又充滿魚鮮味，配埋鍋裏面嘅蔬菜同埋豆腐咁食，感覺都幾滿足。至於壽司方面，叫左個金龍卷，即係炸蝦卷再加三文魚混合嘅一款壽司，感覺食起嚟就好似平時嘅炸蝦卷再加埋花之戀嘅味道，味道都算搭配；而最後就叫咗一客火山，顧名思義，就係將一啲蟹柳蟹肉，再加埋蟹籽同唔同醬汁混合而成，係一啲蟹柳壽司卷上邊堆成嘅一個火山嘅模樣。食落淡淡蟹肉都幾和味。