留家廚房

同朋友嚟試下呢間樓面唔算闊落，但地點就腳嘅餐廳。今餐飯好似坐過山車，有伏有驚喜。
開頭有啲失望，碟菜外葉韌到苦，招牌雞唔單止「啞色」，仲要條魚有腥氣，西蘭花凍冰冰，心諗今次中伏。
好在之後有驚喜！碟叉燒肥瘦勻循，蜜汁甜得嚟唔膩，真心難得。碟麵一食就知師傅功架，口感一流。壓軸嘅醉鮑魚簡直係全晚高光時刻，入味到心，酒香同鮑魚鮮味平衡得完美無瑕，絕對係必點！
總體來講，功夫係有嘅，但品質唔穩定。我會為咗碟醉鮑魚、叉燒同個麵再返嚟，至於其他伏位，就大家自己衡量啦！

雖然餐廳環境唔算好寬敞，但尚可接受，而且地點方便易搵。

師傅整呢道功夫菜絕對交足功課，火候同技巧都睇到。味道唔可以話唔好，但係就無咩「食過返尋味」嘅感覺，個性平平，所以下次會試其他嘢。同餐廳無關，純粹係呢道菜唔太合我口味。

外層嘅菜葉實在太韌，搞到個口有啲「嚡口」，而且食到一陣甘苦味，有啲扣分。

老實講，我本身唔係太好魚，所以對我嚟講有少少魚腥味。旁邊嘅西蘭花亦都凍咗，有啲可惜。

呢道菜用返虾头虾壳煮酱，係好经典同埋有心思嘅做法。味道喺意料之内，冇乜惊喜，但绝对係稳阵好食。最大亮点係虾嘅质地，煮得啱啱好，够晒爽弹。

呢個唔錯，肥嘅部位質感一流，而且好入味。

啲麵質真係無得彈，煙韌彈牙，一食就知呢間店係有料到，好識煮麵！

家陣叉燒真係舖舖有，但做得咁勻循嘅真係少。肥瘦相間，啲蜜糖汁甜得嚟唔癡喉，唔會一味死甜，好考功夫，水準之上！

本來期望最高嘅招牌雞，點知失望最大！碟雞一嚟到，個皮「啞色」，同網站光鮮嘅相片完全兩回事。仲要味落得重手咗，失準。

個湯抵飲，最緊要係個肺洗得乾淨，再加啲燶邊帶出焦香，令成個湯嘅味道提升咗，睇到師傅嘅功夫。

全晚最高分呢個醉鮑魚！個汁嘅味道徹底滲透入面，但係又唔會搶走鮑魚本身嘅鮮甜，個平衡拿捏得冚家拎完美，簡直係畫龍點睛！