寶哥火鍋味館 (已結業)

今日去左佐敦寶哥打邊爐，一心諗住打邊爐，估唔到$188既價錢都有刺身送。抵讚👍🏼。汽水、啤酒、酸梅湯同雪梨茶都係任飲。打邊爐有涼茶消滯解熱氣，都唔錯。今次揀左好大路既清湯配沙嗲湯底。值得一提係清湯湯底用好多食材餚製，味道唔錯，唔會淡味到似滾水😆。火鍋紙上食物款式比較大路，唔會太多花巧食物，不過基本既肥牛，丸類或者海鮮都有。 揀哩到打邊爐絕對係重質唔重量。當中有好幾款火鍋配料落左單三四轉😆，因為真係好好食。哩到既豆腐真係冇得彈，勁香豆味，食落質感同味道都好似冇落糖既豆腐花🤤🤤🤤，好滑。哩款黑豚肉又係必食之選，豚肉脂肪部分都唔少，食落肉質好淋，又爽口。兩個人食得唔多野，不過試左佢個汕頭牛筋丸同必試魚蛋都覺得唔錯。丸類非常爽口彈牙，又滑，口感超好。牛坑腩唔係間間火鍋店食到。肉質好淋，啖啖肉，不過比較大件，食多兩件好易飽，多人食我會超級推介。蔬菜同魚都好新鮮架！打邊爐點少得肥牛。哩款美國肥牛肉質好淋，一啲都唔肥膩👍🏼。哩到個烏冬都唔錯，口感煙煙韌韌。同個沙嗲湯係絕配。