丼瀛 (已結業)

早幾日約咗朋友去旺角行街，講起食日本野就諗起依間餐廳記得係主打海膽刺身杯同埋刺身雜錦飯。入到去見到都算幾多人，不過好彩近排唔使排隊。入到去坐低見到餐牌有好多款式嘅嘢食，我同朋友首先就叫咗個羽衣甘藍無花果沙律，沙律嘅份量都好多，而且好少沙律會用無花果來做水果，食落去嘅味道好甜同沙律嘅味道都幾夾。主菜方面我哋就分別叫咗一個龍蝦刺身飯配蒟蒻冷麵，成個買相同埋份量都好多，刺身同埋龍蝦亦都非常之新鮮，另外蒟蒻冷麵中間配左海膽汁，食落去嘅感覺鹹鹹甜甜，仲有啲涼浸浸嘅感覺好特別。成個飯配埋刺身同埋新鮮嘅龍蝦食完已經覺得好滿足跟住我同朋友仲叫咗個雜錦魚生壽司拼盤，份量都好多而且質素都唔錯分別有甜蝦、海膽、帶子、同埋碎拖羅。無論係擺盤同埋食物嘅味道都幾好。跟住就到必叫既海膽杯，總共係有九層嘅材料，雖然海膽杯嘅份量比我想像中細杯，但係海膽嘅味道鮮甜而且中間夾著其他嘅配料感覺幾特別，都值得一試。