民華餐廳

營業中

休息中

雖然民華餐廳開咗好耐，但一直都冇入過去食，今日終於獻出我嘅第一次，入咗去民華餐廳。民華既裝潢同環境同一般茶餐廳大同小異，但值得一提，梳化位非常舒服。見佢餐牌寫住「蕃茄湯底加炒蛋一同享用更美味」，我決定叫常餐。常餐總共包括三款食物，價錢都係$40左右，應該係我食過咁多間餐廳之中，常餐最平嘅一間。多款通粉之中我叫咗最傳統嘅蕃茄牛肉通粉，分量足夠，牛肉煮得幾軟稔，冇咩筋。蕃茄湯底唔係太酸嗰種，甜酸程度適中，整體味道的確不錯。常餐仲有火腿炒蛋同即烘牛油多士。炒蛋質感軟綿綿，將多士同火腿炒蛋夾埋一齊食超正。其實常餐份量非常多，不過今日冇食早餐，所以叫多個西多士。西多士呈金黃色非常吸引，而且幾厚身，加上外脆內軟，所以好快就食晒。呢排天氣非常炎熱，當然要飲杯紅豆冰，消暑解渴。出到門口發現民華有買新鮮滾熱辣嘅麵包。遲啲返工嘅時候可以嚟買麵包當早餐。