金玉滿堂

營業中

休息中

今日食咗一間係旺角鬧市入邊，街市之中嘅隱世大排檔，門口有２個魚缸，又有龍蝦又有鮑魚，好似唔簡單咁喎，就要會一會佢啦，七味炸豆腐豆腐外皮香脆，炸粉夠薄，外脆內軟既口感好正，蒜香味好烈，而師傅係表面加番啲鹽花，香更加濃烈，份量都好多，作為小食特別開胃。黃金珍寶蝦球黃金蝦球一向都係我最愛，叫咗個黃金珍寶蝦球，蝦球炸得好香脆，大大粒，鹹蛋黃好入味，表面充滿鹹蛋黃蓉，口感沙沙，味道鹹香，蝦肉好新鮮食落去爽口彈牙，送酒小菜真係一流。啫啫通菜煲食咗咁多炸嘢要叫番個菜先，呢個惹味既啫啫通菜煲，上枱嗰陣已經係喳喳聲，聞到好香蝦醬嘅香味，加埋大條蝦乾一齊炒，肉碎又鹹香味十足，味道都好惹味，通菜仲保持到翠綠，口感鮮嫩爽口，鑊氣十足，送飯一流。豉汁蒸白鱔白鱔肉好嫩滑，而且豉汁味好濃，每一舊都被豉汁包裹住，而且皮同肉都充滿鱔嘅油香，送飯真係爬多２碗啦。