浜松水產 (已結業)

又出動搵居酒屋覓食，今次嚟到旺角！餐廳位於地牢，一行入去就好似入咗一個小日本咁，裝修得好靚。食物種類眾多，特別在呢度嘅刺身居然有龍蝦同象拔蚌，唔使諗即刻叫一份拼盤嚟試吓。刺身大約有九款：赤貝、鮑魚、拖羅、三文魚、帶子等等，每款兩片，主角龍蝦刺身份量頗多，食落新鮮，爽口彈牙，肉質有咬口！其餘刺身之中，海膽最為鮮甜，大滿足啊！鵝肝多士煎得剛好，油脂四溢口感滑溜，配多士食一流！另外叫咗四隻燒廣島蠔，雖然口味比較港式，但仍然食到蠔嘅鮮甜味。最後叫左煎餃子收尾，似乎成隻炸過咁脆卜卜，大隻又紮實，滿足晒🫶🏻值得一提嘅係呢度嘅sake唔貴，同朋友share一支好抵飲！👏🏻