第三站

今次同朋友嚟到旺角呢間樓上Cafe，坐低慢慢食個晚餐同傾吓計。叫咗兩個餐，其中一個加$30仲可以有頭盤同甜品。C餐係意式芝士焗肉醬意粉（$96），肉醬意粉份量好多，食落帶點酸甜微辣，意粉軟硬適中，配埋芝士，整體配搭唔錯。H餐係煙三文魚野菌忌廉燴意粉（$116），除咗煙三文魚同野菌之外，配料有生洋蔥，食落香辛微辣，令到意粉更加好食。意粉加咗忌廉烹調成為醬汁，食落口感帶點Creamy，但忌廉份量可以再多啲，令味道可以更加濃郁。額外仲叫咗個特級海鮮拼盤（$78），有魚柳、炸蝦、炸蟹鉗、帶子同薯條，配有沙律醬同番茄醬，味道正常發揮。飲品叫咗芒果乳酪沙冰同熱薄荷朱古力。芒果乳酪沙冰上面有忌廉同芒果醬，飲嘅時候將忌廉同沙冰混合，口感creamy柔滑，同芒果乳酪沙冰非常配合！熱薄荷朱古力上面亦有忌廉同薄荷醬，朱古力味同薄荷味都算突出，飲落甜度合適。