Le Viet (已結業)

星期日上完兩堂瑜伽之後，梗係要搵啲好嘢食補充一下體力啦。去到銀行中心搵左呢間越南嘢黎食。入到去地方好開揚，可能因為已經過咗午餐時間所以人唔算多，職員好好安排左我哋坐窗邊，係寧靜嘅環境望住個條平時好繁忙嘅西洋菜南街，別有一番風味。拼盤有四款嘢食，分別係豬頸肉、春卷、炸蝦餅同埋扎肉蒸粉包。豬頸肉似係碳烤一樣咁香口惹味，炸蝦餅就夠晒大舊，春卷炸得香脆之餘又唔會太乾身。辣椒膏大蜆炒得香濃惹味，辣到適中，就算唔係好食得辣嘅人都可以好好享受呢味菜，啲蜆肉就真係大大隻，啲肉幾乎填滿左個殼一樣，味道鮮甜。黎到重頭戲就係咖喱炒肉蟹，名副其實嘅肉蟹，多肉到一個點，滿滿又鮮甜嘅蟹肉，配上濃郁嘅咖喱，真係令人食到停唔到口，就算平日好怕要拆殼嘅我都忍唔住出手食佢。再加上個椰青又大又鮮甜，兩個人飲都好足夠。好滿意嘅一餐，我哋已經喺度諗緊下次幾時黎再食過。