牛極 (庇利金街) (已結業)

朋友今日話想食牛扒，時常經過好多區域都見到呢間牛極，今日係開佐敦呢邊就試下啦～入到去之後先係售票機果到買左飛先，好似日本既拉麵店啊！可以選自己想食咩款式既牛同幾多份量！岩曬各人有不同需要啊！我呢，就叫左200g既牛柳$110，朋友就叫左80g既牛肩$80！之後我地坐低左，店員話可以去拎飯同沙律係自助同任食既！但行到去發覺仲有牛肉湯同各式醬汁配牛肉既！為免彈到成身都係油，仲好貼心有圍裙提供tim!等一陣牛扒黎到啦，牛扒黎到時係一成熟既，放到一塊好熱既石板上，每塊切開時再係石面煎一煎，煎岩自己喜歡既熟度就可以食啦！我呢塊牛柳，好淋啊！牛本身有d調味，所以都不用太多額外調味，夠味！不過朋友鐘意食濃味d,都有加小小辣醬，話都好夾既！另外呢個牛肉湯，類似羅宋湯既，都幾好飲，有夠蕃茄牛肉湯味！另外沙律都幾新鮮，配埋芝麻醬可以自己落幾多都得，好食啊！另外白飯任裝啊！白飯係日本米，都好好食啊～食到中間如果石板唔熱，可以叫店員再換，繼續煎黎食架～另外朋友既牛肩肉都係好juicy 好香牛肉味既❤️呢間牛極真係cp值超高啊！