Hokahoka

營業中

休息中

星期五晚上突然約朋友食飯，佢指明要去尖東，惟有上OpenRice search 下，見到呢間餐廳，又記得屋企人試過話正，7點先打電話去訂8點，竟然有位，非常好彩同意外。餐廳係傳統日式格局，我地兩個被安排坐褟褟米，枱下有位放腳，無需蹺腳。因為出面太熱，先叫杯梅酒同calpris soda解熱，兩杯飲品味道剛好，唔會太甜太淡。食物叫咗三色丼，$170，價錢算合理，海膽唔算鮮甜但夠滑，三文魚子夠彈口汁多，碎吞拿魚亦幾香口。之後叫咗明太子茶漬飯，味濃三文魚子幾配淡口茶漬飯。仲有燒飯團，上枱先知叫咗咁多飯，燒得香但裡面無餡，可以飲啖附送嘅麵鼓湯令口無咁淡，因為我地又叫咗明太子雞翼，我用部分明太子送飯團。明太子雞翼燒得適中，裡面啖啖明太子。仲有叫咗燒牛舌，一份兩串，牛舌大大片，仲要好彈牙，正。兩個人食咗咁多都係每人$280，又坐得舒服，食物水準唔錯，會再來。