景福餐廳

營業中

休息中

成家人忙屋企嘢，工人都唔得閒煮飯，於是落街食餐簡單晚飯。5個人叫咗4人餐($178)，煲仔飯($50)、炒清菜($30)，滑蛋蝦仁啲蝦好大隻，啲蛋炒得啱啱好唔嚡勁滑。鹹魚雞粒豆腐勁多豆腐同雞粒，調味都夠鹹香雖然鹹魚味稍遜。金菇肥牛煲唔夠沙嗲味，普通正常。要咗原條蒸鰽魚，夠大條魚肉又滑，阿媽話自己响街市都要廿幾蚊，仲要煮同洗。窩蛋牛肉煲仔飯嘅牛肉好似山竹牛肉餅咁，略實，味道都幾好，最開心係有唔燶嘅飯焦，掂！清炒芥蘭要求腍啲，嚟到唔會太爽，幾好。啲湯好熱口，加嘢飲都係$2一杯起。每人五十幾蚊有湯有餸有飯，仲要味道好冇乜味精，暫時全個新蒲崗得呢間。