丼丼屋 (創紀之城五期(apm))

營業中

休息中

一坐低店員隨手啪一聲掉張單上枱，已經覺得好冇禮貌，當佢忙，想慳嗰半步時間包容下。QR Code落單嗌咗兩樣嘢，其中一份係牛肉湯烏冬配溫泉玉子定食，啲「牛肉」非常柴，並且帶有豬肉腥味，肉質、口感、色澤一啲都唔似牛肉。舉手問店員，佢哋見到當見唔到，走去執枱抹枱拖到最後一秒先過嚟。拎返入廚房問都話係牛肉，咁算數啦，當佢係真係難食唔係出錯，我自己擺開唔食就算。另外一份係燒和牛丼定食，下午1:30坐低，1:41落單，烏冬都食咗大半，份牛丼2:05分都未到，但見客人唔多，隔離位遲過我哋到都已經食咗一半，諗住追一追，又舉手想問下，有2個店員都係淨係掛住執枱，就正正企喺我哋後面，睇到舉晒手，嗌晒唔該都唔行埋嚟，當時外面冇人排隊，好多空枱。最後樓面唔見晒人，我唯有大聲禮貌哋請求協助，終於有人埋枱對單又對唔啱，話個滑蛋豬扒丼咪上咗，九唔搭八，都冇叫呢樣。嘢食質素一般，店員服務態度好差，餐廳環境唔特別舒適，價錢一般正常。做餐廳唔係奉旨俾人鬧，但我去消費好聲好氣好禮貌溝通，希望得到正常合理嘅服務態度，唔係去受氣。唔想做唔好做，請到啲咁嘅員工實在係僱主嘅不幸。