CACAOLAB

營業中

休息中

呢間嘢都好似開咗好耐，喺白沙道有兩層，望落幾高級，原來係主要賣朱古力嘅。之前喺網上見到有人話佢啲蛋撻好食，四點零鐘行過，咁啱啲蛋撻新鮮出爐，好香呀，買嚟試吓。朱古力千層撻啱啱出爐，成間舖頭都好香麵包蛋撻味。包裝好精緻，一盒兩件。望落個樣係靚嘅，但啲蛋漿比較少。咬落去個皮係脆，不過係有少少硬嘅脆，同埋蛋撻底都啲油；個蛋漿雖然少少哋，但係好香滑，唔算好甜，食到底仲有少少朱古力，啲朱古力有啲苦味，可以中和蛋漿嘅甜味。$14一件係性價比好高。蜂蜜麵包呢個麵包好抵食，好似係$32 ，但好大舊。個麵包好鬆軟，食落去蜂蜜味好出。麵包上面有啲粒粒，其實我都唔知係咩嚟，啲粒粒好脆，有少少似菠蘿包上面嘅脆皮，令成個麵包嘅層次豐富咗。擺咗一半麵包第二日食，都仲係好鬆軟，推薦！原來樓上仲有好多座位，可以坐低慢慢飲杯野食個包，好似Cafe咁，行開銅鑼灣可以試吓。