順日本料理 (已結業)

⛩「順日本料理」位於天后住宅區，上星期日專程去咗食佢嘅名物「厚燒牛舌飯」$108+10%，因網上見到「限量架要早啲去」，所以為免白行一趟12:15就去到（午市12:00-14:30），唔駛等入去坐低觀察咗一陣，見其他客人幾乎全部都係叫「厚燒牛舌飯」，由於即叫即燒需時約15-20分鐘左右。🥢上菜時第一眼見到實物都幾震撼，剛剛烤好傳來陣陣燒烤香味，而且真係厚到呢，仲有五大片已經完全覆蓋咗成個碗！✏️原本都有啲懷疑咁厚係咪真係會夠淋架，第一舊咬落去係淋但未到鬆軟嘅level，跟住其他幾舊就真係超級鬆軟，簡直唔駛點出力咬，呢個分别應該係由於不同部位嘅輕微差異，味道方面亦佳，有肉汁有油香冇雪味，配埋紅薑片一齊食可以解膩。因為煮牛舌真係要好多心機先整得好食，但要搵到好食價錢又合理嘅真係唔容易，呢間直頭係抵食！好奇問過店員一個午市有幾多份牛舌，答案係差唔多百多份！所以想去食嘅朋友就算趕唔切12:00去到都唔駛放棄呀！