家嫂一家大小

營業中

休息中

咁岩呢幾日天氣比較凍，一班朋友出去食飯打邊爐就最適合不過，但又想食有特色啲嘅火鍋放題，就有朋友提議食家嫂。呢度唔單止有普通火鍋，仲有好多小食可以任食，紅白酒任飲。咁多款小食最推介佢嘅松露蝦多士，一啖一舊，松露醬落得一啲都唔孤寒。另外小籠包都好有特色，有一支心形醋插喺小籠包中間，可以自己唧落去。另外鹽燒雞中翼都炸得好鬆脆，啖啖肉。食完小食人齊就可以上刺身，好大一隻刺身船，刺身只上一round，但款式都好多，份量嘅話就預返每人每款一片，仲有原盒海膽，可惜既係海膽有少少苦味。刺身食完就開始食雞煲，雞煲可以揀辣或者唔辣，因為唔係個個都食得辣，所以揀咗BB辣，雞煲味道唔錯，唔會太鹹，但啲雞就冇乜肉。最後就係重點嘅海鮮火鍋，湯底揀左家嫂花膠老火湯鍋，湯底都幾鮮，打邊爐之前可以飲咗一碗湯先。海鮮款選擇唔係好多，但夠新鮮，鮑魚上左枱一陣都仲係好生猛。除左海鮮，一般火鍋配料、肥牛、豬肉都有！個晚7點入座，可以坐到10點半先走，如果一大班朋友食既話都幾推薦黎家嫂，選擇多之餘又有足夠時間傾計。