就是偏偏喜歡你 (已搬遷) 新店位置

喺銅鑼灣搵咗間浪漫餐廳食lunch，點解係浪漫？因為聽個餐廳名就知道，間餐廳叫做「就是偏偏喜歡你 Say, I love you 」地址就係銅鑼灣耀華街3號百樂中心16樓1602-1603號舖。餐廳嘅裝修好似去咗一個秘密花園咁，好適合打卡，而且仲有一隻垂耳兔🐰坐鎮，非常可愛。午餐我哋叫咗菠蘿照燒雞漢堡、意式黑松露野菌炒意粉同埋一款甜品，好似叫做蜜桃甜心心窩夫。不過特別想講吓個菠蘿照燒雞漢堡，我覺得真係幾好食，非常之好有心機去整⋯⋯漢堡包用上竹炭嘅漢堡包，所以係黑色，幾型仔！然後夾着照燒雞扒，下面係焦糖菠蘿，所以咬落去會有啲焦糖嘅脆脆，真心正👍🏻，在下一層就係厚厚嘅蕃茄，喺照燒雞扒同埋焦糖菠蘿嘅惹味之下，蕃茄嘅作用就係refresh你口中嘅味道，跟住就係沙律菜，最底層就有塊芝士，另外佢嘅醬汁係用上日式芝麻醬，所以整體呢一個漢堡包嘅味道係有好多個層次，推介！