滋味補身的【砂鍋麻辣羊腩煲】就合時宜
天寒地凍，推介啫啫雞煲和蜆蚧牛肉砂鍋煲
本地私房菜水準來講，佢價錢唔算好貴
今次俾我發現深水埗主打小菜的餐廳
叫 #金多寶海鮮私房菜
餐廳環境好有大排檔和食打冷感覺
同三五知己一齊吹水，飲著啤酒食特式小菜
而佢嘅餸菜水準，絕對唔會令食客失望😋
🐏🍲砂鍋麻辣羊腩煲
唔算好辣，醬汁味道剛好，可特別要求加辣🌶️，可改做打邊爐，就可以變做 #麻辣火鍋 了，加熱食更暖胃。其羊腩份量算多，啖啖肉(唔會得嚿骨)，辛香又惹味，其配菜款式多，特別係支竹和萵筍亦好入味。
🐓🍤啫啫雞煲
🐔雞件相當滑溜，連雞皮都香口入味，我特別喜歡吃豬膶，補鐵質又惹味，佢個汁好味到可以攞嚟撈白飯亦得。
🐮🍲蜆介薑蔥牛肉煲
除咗蜆介鯪魚球外，第二個我就最鍾意食蜆介煲，牛肉片相當大塊，而不是碎濕濕的。識食就要食長條蔥，好有薑和蜆介嘅滋味。
🐷酥炸豬大腸
好多人都知豬大腸好正，橙紅色外皮脆口，大腸又夠肥美，再沾上甜酸醬，相當有口感，底部仲有驚喜，仲有冰凍嘅菠蘿片，消脂解膩 ! 記得呢個一定要趁熱食🙊。
🦪蠔仔粥(小)
專登叫俾仔仔，其實份量真係唔小😆，原粒蠔仔多到每一匙羹都有，唔會有沙，配上幾片方魚，令粥底都非常鮮味，鮮甜到可以當湯飲。
😋評分: 連我要求多多嘅老公都大讚，餐廳食物水準唔差得過大茶樓，主廚強哥手勢好，配料又多，仔仔都比平時食多咗，係好值得一試嘅港式私房菜餐廳。
下次我一定要試【鹹蛋香的黃金炸鮮魷🦑】同靚中湯，另外佢午市同下午茶都好抵食。
