佐敦：出名多嘢食！識食嘅當然要捐窿捐罅，只要深入佐敦呢個迷城，就會給你一個驚喜！主打越南菜嘅越火越式湯粉，令人一試難忘，香濃嘅湯底同各種特色嘅越南小食，令人有種迷失喺越南街角嘅錯覺。
柚子蝦沙律
份量十足，除咗作為開胃菜之外，鐘意食沙律嘅朋友亦可以當主菜。沙律菜同柚子嘅比例係一比一，每一啖沙律菜都充滿住柚子的微酸與微甜，彈牙嘅大蝦更吸收晒柚子嘅味道，充滿越式風情。
烤豬頸肉米紙卷
食越南菜又點少得米紙卷呢！豬頸肉嘅油香令米紙卷嘅味道昇華，而蘿蔔絲則為米紙卷增添爽脆嘅口感！
火車頭湯粉
想食多啲唔同嘅配料越南Pho，當然就係叫火車頭啦！越火越式湯粉嘅火車頭湯粉配料有牛丸、牛柏葉、牛腩同牛肉，份量絕對唔簡單！而最精華嘅地方就係佢濃厚嘅牛骨湯，香味濃到好似一開門就俾火車頭撞到一樣咁衝擊。
