生龍清湯腩 (褔榮街)

營業中

休息中

今日放工出深水埗黃金購物，順道逛逛玩具街，當然要喺附近地道食店食番餐，位於福榮街嘅《生龍清湯腩》遠近馳名。崩沙腩同爽腩咁矜貴原因係每800斤牛只有1斤4両崩沙腩，2斤4兩嘅爽腩，每日限量發售，今晚得爽腩，坐坐下連爽腩都反埋牌喇。極品爽腩~嘩嘩嘩，賣相已經好吸引，爽嘅部位有一層薄軟膠質，爽軟不硬，黐住肥位，食落有多重口感，牛肉味香濃，爽得嚟滑捋捋，肉嘅部分都炆得好淋，仲有幾件白蘿蔔，煮得夠淋又入味。咖哩牛筋肚飯(小辣)~咖哩都係呢度嘅招牌菜，牛筋及牛肚可以一齊上，同樣都係乜得好淋好入味，咖哩配飯一流。蜆蚧鯪魚球~叫多個小食，炸鯪魚球，即叫即炸，熱辣辣小心燙口，果然好好食，真材實料，正！不得不提，佢個XO辣醬都好惹味！咸檸七~食得肥膩又食咖哩，來一個咸檸七解一解油膩。臨走嘅時候見到門口有自家製甜品，桂花糕、馬豆糕、紅豆糕等，街坊價，抵食。