蘇杭冰室

營業中

休息中

記得以前返part time嗰陣成日同一班同事黎蘇杭食lunch。自從呢幾年冇再返嗰份part time之後就冇機會再食。今次難得路過上環，就同朋友黎食個brunch，回味一番。招牌沙爹牛肉麵配火腿奄列豬仔包$40沙嗲味道濃郁，牛肉嫩滑，沙爹醬份量多，所以成碗麵都好夠味。公仔麵煮得軟硬適中，係一碗出色嘅沙嗲牛肉麵。呢度有得揀豬仔包或者多士，豬仔包好似比較少見，比較特別。火腿奄列幾大份，味道唔錯。自製麻辣肉丁米配火腿奄列多士$40本身以為會好似五香肉丁咁，但原來呢度嘅肉丁係自家製嘅，比較特別嘅。望落唔係好辣，但原來麻辣味十足。米粉都好索麻辣味，正。肉丁幾嫩滑，同平時啲罐頭五香肉丁好唔同，相當值得一試。多士烘得好均勻，唔錯。招牌蔥花三拼滑蛋飯$60三拼即係牛肉、蝦仁同埋叉燒，一次過滿足幾個願望。蝦仁大大隻，食落爽口彈牙。叉燒係半肥瘦嘅，唔鞋又彈牙。牛肉份量都幾多。滑蛋炒得好嫩，充滿蛋汁。豉油係另上嘅，可以自己揀落幾多，就唔使驚太鹹啦。凍檸茶+$3熱鮮奶+$8呢餐係滿足嘅一餐，好想快啲再有機會嚟食麻辣肉丁米。