成都老碼頭火鍋 (已結業)

門面已經古色古香，內裡空間大，打邊爐好舒適。同其他好多火鍋店一樣有醬料區，但最不一樣就係有自己一罐罐既油碟，充滿自己特色，可以降低食物溫度。火鍋料選擇都好豐富，又有其他小食揀。入座打咭已送百事生可樂，微信點餐再送汽水，真係飲品錢都慳返。不過最正都係訂座截圖贈送Prime極品牛小排半份，你以為送既野唔會係正野，佢就送高質牛，雪花紋靚，仲要冰鎮，入口香嫩，食呢個都賺返。價錢仲有惠優 : 19:30前離座或21:30後入座，有68折，其餘時段都有88折。打邊爐飲啤酒既，$9 藍妹/ Hoegaarden生啤。宮庭藥膳湯藥膳湯清清地，感覺健康，藥膳味唔會膩，不同的火鍋材料都岩。日本 A4牛頸脊脂肪較少，有咬口，味道鮮甜。蒙古羊肉片羊肉羶香，口感爽。老友鬼鬼（墨魚滑）油炸鬼配墨魚滑，只需輕輕一灼，墨魚滑好彈牙。七彩繽紛丸子拼稻庭烏冬（一客兩個)一次上七款(彈牙牛筋丸，龍蝦沙律丸，順德魚腐，黒椒馬啼豬肉丸，咸蛋流沙魚蛋丸，碼頭鮮蝦脆肉腸，芝士小籠包)，每款兩粒，岩晒二人火鍋又唔食得多，連埋稻庭烏冬一樣一客兩個。即炸響鈴脆卜卜的即炸響鈴，秒速入火鍋湯就要食。手工韭菜餃飽滿，唐生菜新鮮爽脆。